Un Hembrynkyas a’n Sordyans – John Trevysall a Vadron

Eglos Vadron
Eglos Vadron

Nyns us covath travyth tuchya Trevysall saw Scryf attainder. Yma nebes skylas rag hemma – mars o John Trevysall y hanow gwyr, martesen nyns o ef a vry lowr rak gasa scryvennow hag a wruk gul menek anodho. Skylys erel yu nyns o hynwyn tylu settys; an usadow rag hynwyn tylu a dheth yn termyn whetegves cansbledhen. Kens dhe henna, tus a wruk cafos leshynwyn grondyas war aga ober, po nebes gesyans, po y a wruk cafos patronymics (X map po myrgh Y) po yth esa skyla aral.

Yth yu possybyl bos hynwyn Kernow ancoth dhe scryvynyoryon Sawsnek, ha martesen scryvynyor a wruk clewes hanow “Trevysall” mes tus Kernow a wruk leverel “Trevisa”. Hem yu afydhys pan ve gyvyans, whegh bledhen awosa pan henwys an attainder John Trevysall, mes scryfys a ve Trevysa avel dewys yntra deu. Nyns us skylys rag gyvyans covathys, mes yma deryvadow tylu dhe les. [1]  Hem yu redya, yn ran:

“Thomas Tretherf a Dretref, Kernow., m. ha e. dhe John, ha Mary y wrek (m. ha e. dhe John Trevysa po Trevysall ha cothmens ha e. dhe Henry Trevysa) hag Amica Trevisa, gwedhowes hag asectoures dhe John Trevysa, 23ves Mys Me.”

Martesen Tretref yu Trereife yn Vadron. Yma’n gwythres ma ow cusulya John Trevysall nep a ve attaintys o an kethsam John Trevysa nep a ve campollys gans y vroder Henry yn gwythres (A. 10288) ogas dhe 1468[2] ha redya:

“Lyther attorney gans John Trevysa hag Amisia y wrek dhe William John, chaplen, ha John Pellour, delyfra seisen dhe Henry Trevysa ha Martin Pendre, a dyryow, yn Lannargh Mor, Hellys, Hellogan, Bodryvyell, Trewodones, Carvolgh, Carnegynfyn, Boswyn, Trevynsyn, Penhelek Byan, Polleowe, Trefoyll ha Padystowe. Lannargh Mor, 10ves Mys Est, 22 Edward IV. Selyow.”

An den-jentyl ma o perhenek tyr y’n lurneth, hag y fyth da desmygy moy tuchya pen tyluyow a Vadron.

Scryfys ha trelyans ha fylmys gans Matt Blewett.

[1] https://www.british-history.ac.uk/letters-papers-hen8/vol1/pp234-256?fbclid=IwAR0rMqpkMjHGHzr7pRjDrTk7KrVCZxQSyN6bHMhWTLivqYC6NOOxm9-NYV8

[2] https://www.british-history.ac.uk/ancient-deeds/vol4/pp520-533

Share this post

Leave a Reply